PAENITENTIARIA APOSTOLICA
Prot. N. 95/05/I
DECRETUM
PAENITENTIARIA APOSTOLICA, vi facultatum sibi specialissimo modo a Sanctissimo in Christo Patre et Domino Nostro, Benedicto Divina Providentia Papa XVI tributarum, Eminentissimo ac Reverendissimo Domino Ioanni Aloisio Sanctae Romanae Ecclesiae Cardinali Cipriani Thorne, titulo Sancti Camilli de Lellis, Archiepiscopo Metropolitae Limano, Primati Peruviae, benigne concedit ut, die quater saeculari anniversario ab ingressu Sancti Turibii de Mongrovejo, Limani Episcopi, in caelestem patriam, vel alio die in utilitatem fidelium rite determinando, post litatum divinum Sacrificium, impertiat omnibus Episcopis, presbyteris, diaconis, religiosis et christifidelibus adstantibus, qui, animo omnino elongato ab affectu peccati, in Basilica Primatiali Ecclesia ilsdem sacris interfuerint, Papalem Benedictionem cum adnexa Plenaria Indulgentia , suetis sub condicionibus (Sacramentali Confessione, Eucharistica Communione et Oratione ad mentem Summi, Pontificis) lucranda, integra manente facultate trium illarum quas de iure communi per annum potest largiri.
Christifideles qui Papalem Benedictionem devote acceperint, etsi, rationabili circumstantia, sacris ritibus physice non adfuerint, dummodo ritus ipsos, dum peraguntur, ope instrumenti televisifici vel radiophonici propagatos pia mentis intentione secuti fuerint, Plenariam Indulgentiam , ad normarn iuris consequi valebunt.
Contrariis quibuslibet non obstantibus.
Datum Romae, ex aedibus Paenitentiariae Apostolicae, die XXVIII mensis Aprilis anni MMV.
Jacobus Franciscus S.R.E. Card Stafford
Paenitentiarius Maior
Ioannes Franciscus Girotti, OFM. Conv.
Regens
PAENITENTIARIA APOSTOLICA
Prot. N. 51/05/I
DECRETUM
Certior factus est Beatissimus Pater Benedictus divina Providentia Papa XVI de laudabili prorsus mente, qua Em.mus D. Ioannes Aloisius Card. Cipriani Thorne, Archiepiscopus Metropolita Limanus, Primas Peruviae, omnibus eiusdem dicionis Episcopis animo in eumdem sensum concurrentibus, proxime adventurum quater saecularem anniversarium diem ab obitu, immo vero ab ingressu Sancti Turibii de Mongrovejo, Limani Episcopi, in caelestem patriam, sollemnibus ritibus celebrandum statuit, simul etiam memorandum, gratiis agendis Deo, quinquagesimum revolvendum diem a condito Consilio Episcopali Latinoamericano, quod quidem, hanc nactum occasionem in urbe Limana, generalem suum conventum est acturum.
Talis enim meriti et significationis fuit episcopalis missionis et navitatis perfunctio, a Sancto Turibio exercitata, ut ipse Apostolus sit censendus, non solum Limanae Archidioeceseos et totius Peruviae, vel etiam fere totius Latinae Americae: quando quidem immensas suo pastorali officio concreditas terras infatigabilis peragravit, Evangelium nuntiandum ipse ibidem curavit, sapientissimas ecclesiastici regiminis leges protulit, christianam conversionem suorum fidelium promovit, praesertim rite suscipiendorum sacramentorum copiam vel ipse faciens vel a sacerdotibus praestandam disponens, sacerdotalium vocationum a Deo donum precibus effusis impetrans easque apta ascesi custodiendas scientiisque sacris ornandans colens. Simul etiam Sanctus Turibius vindex fuit iurium indigenarum Americae populorum pacisque efficax sequester inter illos et ex Hispania oriundos cives.
His omnibus perpensis, Sanctitas Sua decrevit suam laudem tribuere futuris celebrationibus, easque acceptiores christifidelibus facere per donum plenariae Indulgentiae, incitamentum nimirum plenioris semper conversionis ad Deum, generosioris virtutum cultus, fidelissimae adhaesionis Sanctae Catholicae Romanae Ecclesiae.
Auctoritate itaque Apostolica, haec Paenitentiaria per praesens Decretum benigne concedit plenariam Indulgentiam , suetis condicionibus (sacramentali Confessione, eucharistica Communione et Oratione ad mentem eiusdem Summi Pontificis) rite adimpletis, animo quidem omnino elongato ab affectu erga quodcumque peccatum, omnibus et singulis christifidelibus lucrandam, si sacram aedem, ut infra, devote visitaverint, ibique iubilari functioni vel pio exercitio in honorem S. Turibii, Ep., attente ac religiose interfuerint, vel animo piis considerationibus intento constiterint per congruum temporis spatium, concludendum recitatione vel cantu Orationis Dominicae et Symboli Apostolorum, et invocatione Sancti Turibii:
a. in Limana Archidioecesi : quotidie, a die 17 Maii 2005 usque ad diem 27 Aprilis 2006, in Basilica Primatiali Ecclesia;
b. Aliis in ecclesiasticis Peruviae circumscriptionibus : quovis sabbato et die dominico, a die 1 Octobris 2005 usque ad diem 27 Aprilis 2006, in Cathedrali Templo, vel in Ecclesia, pro utilitate fidelium, ab Ordinario rite designanda.
Senes, infirmi, omnes qui legitima causa domo exire nequeunt, plenariam Indulgentiam consequi poterunt, dummodo, animi voto sese iis sociantes, qui piam visitationem agent, concepta detestatione cuiusque peccati, prout supra dictum est, et intentione praestandi, ubi primum licuerit, tres consuetas condiciones: a. coram pia imagine, Orationem Dominicam et Symbolum Fidei devote recitaverint, addita pia invocatione in honorem S. Turibii; b. vel saltem, si ne istud quidem persolvere valebunt, aegritudines et incommoda propria Misericordi Deo humiliter et fiducialiter obtulerint.
Partialem autem Indulgentiam christifideles acquirere poterunt quoties, corde saltem contrito, operibus sive misericordiae, sive paenitentiae, sive evangelizationis ab Ordinariis propositis, pie incubuerint.
Contrariis quibuscumque minime obstantibus.
Datum Romae, ex aedibus Paenitentiariae Apostolicae, die 26 Aprilis 2005.
Jacobus Franciscus S.R.E. Card Stafford
Paenitentiarius Maior
Ioannes Franciscus Girotti, OFM. Conv.
Regens